Liberaj programaroj haveblaj en Esperanto

Ekde kiam mi lernis Esperanton, mi provis ŝanĝi la lingvon de la programaroj sur mia komputilo en Esperanton. Tio ofte ne eblas, sed iam mi trovas bonan programaron kiu subtenas Esperanton. Mi volas kunhavi kun vi la informon pri kiujn programarojn mi trovis. Kaj ĉiu estas kaj libera kaj senpaga.

Mozilla Firefox estas fama retumilo. Verŝajne vi uzis ĝin aŭ eĉ nun uzas ĝin. Ĝi haveblas sur kaj poŝtelefono kaj komputilo. Kaj jes ja, ambaŭ subtenas Esperanton.

Se oni uzas Firefox-on sur poŝtelefono, oni povas ŝanĝi la lingvon en la agordoj (Menuo > Agordoj > Ĝeneraloj > Lingvo > Alklaku Nunan Lingvon). Se oni uzas ĝin sur komputilo, oni povas ŝanĝi la lingvon (Menuo > Elektebloj > Lingvo) aŭ rekte instali la Esperantan version. Kaj ne forgesu ŝanĝi la antaŭfiksitan lingvon de retpaĝoj al Esperanto! Tiu elekto troviĝas sub la elekto pri la programara lingvo.

Ĉiuj haveblaj lingvoj estas elŝuteblaj tie: https://www.mozilla.org/eo/firefox/all/

LibreOffice estas aro de programaroj por krei dosierojn. Ĝi havas tekstoprilaborilon por krei skribaĵojn, tabelkalkulilon por krei kalkultabelojn, prezentilon por krei lumbildojn por prezentoj.

Ĝi similas al Microsoft Office.

Por ŝanĝi la lingvon, oni devas aldoni la lingvon dum la instalado. Bedaŭrinde, la instalilo ne estas havebla en Esperanto. Dum la instalado, se la lingvo de la instalilo estas la angla, alklaku Next kaj tiam elektu Custom anstataŭ Typical. Denove alklaku Next kaj tiam eniru la elektojn sub Additional user interface languages kaj elektu Esperanton kaj ĉiun alian lingvon kiun vi deziras. Alklaku Next kaj elektu ĉiun tipon de dosiero kiun vi deziras ke LibreOffice agi kiel la ĉefa elekto. Alklaku Next kaj alklaku Install.

Oni povas elŝuti LibreOffice-on tie: https://www.libreoffice.org/download/download/?lang=eo

GIMP estas programaro por redakti bildojn. Ĝi estas malsimpla sed tre forta. Oni povas uzi ĝin por redakti ĉion pri ia ajn bildo. Ekzemple, mi uzis ĝin por ŝanĝi la koloron de la hodiaŭa bildo de bluo al verdo kaj tio postulis nur sekundojn per GIMP. Se vi iam redaktas bildojn, ĝi estas bonega programaro.

Ĝi similas al Adobe Photoshop.

Oni povas ŝanĝi la lingvon en la programaro (Redakti > Agordoj > Interfaco > Lingvo) kaj post la ŝanĝo, oni fermas kaj malfermas la programaron. Tiam la lingvo estos ŝanĝita.

Oni povas elŝuti GIMP-on tie: https://www.gimp.org/downloads/

12 thoughts on “Liberaj programaroj haveblaj en Esperanto”

  1. Vi pravas varbi pri ili! Mi vere dankas homojn kiuj kuntradukis tiujn programarojn. Ankaŭ Linukso estas tute en Eo. Kaj nuntempe homoj estas tradukantaj Thunderbird (similas al Outlook sed ĝi estas libera).

    Liked by 1 person

  2. Kaj cetere, estas aliaj programoj kun enkonstruitaj metodoj por la lingvon ŝanĝi. Jem iom da ili:

    – Krita: Settings > Switch Application Languge
    – Telegram: http://t.me/setlanguage/eo-beta
    – Qbittorrent: Tools > Preferences > Behavior

    Sur linukso, alia metodo estas por la mediajn variablojn uzi. Kutime, la variablojn kaj siajn valorojn oni metas en la propraj pravalorizaj dosieroj, ekzemple, ~/.zshenv, ~/.bashrc, ktp. Jen la gravaj variabloj:

    LANG=”eo.utf8″
    LANGUAGE=”eo.utf8″
    LC_ALL=”eo.utf8″

    Per ĉi tiu, Esperanto-lingvon apoj kiel Evince, Simple Scan, ktp, povas havi.

    Laste, sur NixOS-Linukso la lokaĵaron por la tuta sistemo mi ŝanĝis per: https://github.com/ebzzry/dotfiles/blob/master/nixos/configuration.nix#L112

    Like

  3. Dankon por la sciigo kara Jason.

    Mİ havas rimarkon pri vortoj kiel “defaŭlta” en ĉi tiu blogaĵo. “Defaŭlta” kvankam vaste uzata tra la mondo estas vere anglismo kaj ĝi ne troviĝas en PIV’o (vortaro.net). Mi serĉis la “bona lingvo retejo”n kaj trovis kelkajn alternativojn por ĝi:

    defaŭlt·a → implic·it·a, norm·a, antaŭ·fiks·it·a/agord·it·a, ĉef·a (kiam temas pri elekto inter pluraj eblecoj)

    Jen la ligilo al la retejo, kiu laŭ mi estas tre utila. Estas grupo de esperantistoj, kiuj gvidataj de Renato Corsetti pensas pri tiaj vortoj kaj faras sugestojn, kiujn Renato Corsetti registras en ĉi tiu retejo. Mi forte sugestas ĝian uzadon.

    http://bonalingvo.net/index.php/Simplaj_samsignifaj_vortoj_-_listoj

    Amike,
    Vasil Kadifeli

    Liked by 1 person

    1. Mi ne konis tiun retejon, sed mi konis la verkon de Claude Piron kies titolo estas “La Bona Lingvo.” Mi iam volas skribi blogafiŝon pri tiu libro kiam mi finas legi ĝin.

      Laŭ mi, la elekto estas malfacila. Vasta uzado kondukas al vasta komprenado kaj iam kiam mi uzas bonalingvaĵon anstataŭ oftan vorton, la aliulo ne komprenas min aŭ eĉ “ĝustigas” min, dirante “uzu tiun vorton, kiu estas pli ofta.”

      Pro mia kompreno de la tro vasteco de la angla, mi provas uzi neanglajn vortojn kaj frazojn. Ekzemple, la titolo de mia afiŝo pri “la hipotezo de la tero rara” kiun prenis mi de la franca nomo anstataŭ la angla, kiu estus “la rara tera hipotezo.” Bonalingve, verŝajne ĝi estus “la hipotezo de malofta tero.”

      La avantaĝo de mia elekto estas la ofteco de la vorto “rare” parolante la temon alilingve, tial homoj eble tuj komprenus la koncepton, se ili jam aŭdus pri ĝi. La avantaĝo de la bonalingvaĵo estas la pli klara nomo laŭ Esperanto mem, tial homoj, kiuj ne jam aŭdus la ideon, povus pli facile kompreni ĝin.

      Tiuokaze, mi konsentas kun vi. Unu el la elekto de bonalingvo.net estus pli taŭga.

      Ĉiuokaze, mi ne certas. Mi devas fini legi la libron de Claude Piron. Eble ĝi konvinkus min pri la ĉiama supereco de bonalingvismo.

      Dankon pro via helpo, Vasil.

      Liked by 1 person

      1. Ne dankine kaj mi ne kritikas vin.
        Mi nur volis sciigi al vi retejon por konsulti pri pli bona fundamenta vorto. Mi ofte konsilĝas tiun retejon kiam mi verkas.
        Mi iam legis tiun libron de Claude Piron sed mi devas konfesi ke mi torivis en ĝi iomete tre ĝeneralajn konceptojn.
        Amike,
        Vasil

        Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s