Mia progreso pri la franca en 2019

Baldaŭ alvenos la fino de la jaro. Je la komenco de la jaro, mi decidis plibonigi mian francan per kelkaj rimedoj. Ĉiumonate, mi taksis mian nivelon de la franca per la KER memtaksilo. Dum la jaro, iom post iom, mia nivelo pliboniĝis. Hodiaŭ, mi volas esplori mian progreson dum 2019.

Ĉi-monate, mi pli-malpli faris kion mi faris en novembro. Mi uzis Duolingo-n, inkluzive de la rakontoj, kaj mia kunulo de lingva interŝanĝo renkontiĝis kun mi per Skype kelkfoje. Mi faris tiel ekde februaro, kiam mi trovis mian amikon de Francio per iTalki.

Mi uzis aliajn rimedojn dum la jaro. Ekzemple, mi studis per Pimsleur French kaj Lingvist. Tamen, mi ne plu uzas tiujn rimedojn. Dum 2019, mi ne tiom uzis la lernolibrojn, kiujn mi aĉetis, kiom mi volis, sed mi ankoraŭ havas ilin. Eble mi uzos ilin pli ofte en 2020. Mi esperas, ke mi legos pli en 2020. Mia fratino donacis al mi francan libron por Kristnasko, do mi havas alian francan libron por legi.

Plej bedaŭrinde, mia loka franca renkontiĝo ne plu renkontiĝas. Tio mankas al mi ĉar per ĝi, mi povis uzi la francan kun aliaj lernantoj kaj malkovri novajn rimedojn. Eble mi serĉos alian lokan grupon en 2020.

Dankinde, mi malkovris la podkaston innerFrench, kiun mi uzas por ekzerci min pri aŭskultado. Tio estos tre utila ankaŭ en la nova jaro.

Ĉu la rimedoj ĉi-jare efikis? Ni komparu la nivelojn de la komenco kaj la fino de 2019.

En januaro, mi taksis mian nivelon tiel:

    Aŭda ricevado (Aŭskultado) – A2
    Vida ricevado (Legado) – B1
    Parola interagado – A2
    Parola produktado – A2
    Skriba produktado – A2

Mi nun taksas mian nivelon tiel:

    Aŭda ricevado (Aŭskultado) – B1
    Vida ricevado (Legado) – B1-B2
    Parola interagado – A2-B1
    Parola produktado – B1
    Skriba produktado – A2-B1

Entute, mi kredas, ke jes!

En la lasta monato, mi kredas, ke mia produktado pliboniĝis. La kialo, kial mi kredas tion, rilatas al miaj pensoj pri la manko de pliboniĝo en novembro. Tamen, la malo okazis. Ĉi-monate, mi skribis kaj parolis pli. Specife, mi klarigis miajn pensojn pri franca televid-serio tute en la franca. Unue, mi skribe sendis pensojn per mesaĝo. Due, mi plu klarigis la pensojn per Skype. Mi tiel pruvis al mi mem tion, ke mi povas uzi la francan kiel postulas la memtaksilo.

Ekde januaro, ĉiu parto de mia franca pliboniĝis almenaŭ iomete. Mi uzas ĝin pli ofte. Mi komprenas ĝin pli bone. Mi parolas ĝin pli bone.

Dankon pro via subteno dum mia lingvolernado ĉi-jare. Per viaj ŝatoj kaj komentoj, vi helpis min resti kuraĝiĝinta antaŭ la obstakloj kiujn mi trovis lernante la francan en 2019. Mia vojaĝo ne jam finiĝas sed mi estas pli proksima de mia celo de B2 nivelo.

Mia progreso pri la franca en novembro

En novembro, mi havis momentojn de bona progreso en mia lernado de la franca. Mi verkis du afiŝojn pri tio en la tria semajno de novembro. La unua temas pri la sukcesoj mem kaj la dua temas pri ebla kialo de la progreso.

Kiel kutime, mi uzis Duolingo-n. Mi kredas, ke mi uzis ĝin ĉiutage ĉi-monate sen paŭzo de la sinsekvo. Mi ne tiom interesiĝis pri la rangosistemo sed mi ne falis de la ametista rango.

En la lastaj semajnoj, Duolingo aldonis la francajn rakontojn al la poŝtelefona apo. Mi jam faris la unuan aron da rakontoj kaj mi ĝuis la sperton. Mi kredas, ke tio estos bona metodo por ke mi studi la francan, ĉar la rakontoj uzas la lingvon en kunteksto.

Dankinde, mia kunulo de lingva interŝanĝo renkontis min preskaŭ ĉiusemajne en novembro. Mi ankoraŭ bone komprenas lin, kiam li parolas la francan. Mi penis paroli en la franca pli ol kutime sed mia parolo ne ŝajnas tiom pli bona malgraŭ miaj aliaj sukcesoj. Tamen, mi skribis kelkajn mesaĝojn al li en novembro por ekzerci min al la skribado.

Kiel mi menciis en la afiŝo pri miaj sukcesoj, mi aŭskultis podkastojn de InnerFrench. Mi jam aŭskultis kvin el la podkastoj kaj mi plejparte komprenis ilin ĉiujn. Mi aŭskultis ankaŭ kelkajn filmetojn de InnerFrench en YouTube.

Se mi havis tiajn sukcesojn, ĉu mia nivelo pliboniĝis? Ni kontrolu la memtaksilon.

Nuna franca nivelo laŭ la memtaksilo:

    Aŭda ricevado (Aŭskultado) – B1
    Vida ricevado (Legado) – B1-B2
    Parola interagado – A2-B1
    Parola produktado – A2-B1
    Skriba produktado – A2

Ne estis ŝanĝo pri la niveloj. Se mi havis sukcesojn, kial mia nivelo ne altiĝis? Ĉar mi ne volas taksi min tro bona.

Mi kredas, ke mia nivelo pri aŭskultado ja pliboniĝis. Fakte, mi preskaŭ taksis la aŭskultadon je nivelo de B1-B2 sed la nivelon B2 de la memtaksilo priskribas oni tiel: “Mi kapablas kompreni iom longajn paroladojn kaj prelegojn, kaj sekvi eĉ kompleksan argumentadon, se la temo estas sufiĉe konata. Mi kapablas kompreni plej multajn televidprogramojn pri novaĵoj kaj aktualaĵoj. Mi kapablas kompreni la plej multajn filmojn en laŭnorma lingvaĵo.”

Kiam mi spektas televidprogramojn kaj filmojn en la franca, mi ne bone komprenas ilin sen subtekstoj. Kvankam mi komprenas la podkastojn de InnerFrench, kiuj ja enhavas longajn paroladojn, la parolo estas iom malrapida kaj enhavas klarigojn pri maloftaj vortoj aŭ frazoj. La podkasto estas por lernantoj.

Tamen, tio ne ĝenas min. Lingvolernado estas maratono, ne sprinto. Kvankam la memtaksilo ne montras al mi sukceson, la sukcesoj en novembro montras al mi tion, ke mi ja povas atingi pli altan nivelon.

Tion faris mi pri la franca en oktobro

Lastan monaton, mi skribis, ke mi devas trovi rimedojn por plibonigi mian produktadon en la franca. Verdire, mi ne tiom bone faris tion. Kion mi provis?

Mi uzis Duolingo-n preskaŭ ĉiutage. Denove, mi apenaŭ uzis paŭzon de la sinsekvo. Tamen, mi ne plu kutime ripetas la vortojn laŭte kiam mi faras lecionon. Kiel antaŭ kelkaj monatoj, mi tro interesiĝas pri la rangosistemo. Mi faris lecionojn por gajni spertopoentojn, ne por lerni la francan. Tiuj du problemoj malhelpas min kaj devos ŝanĝiĝi en novembro.

Kelkfoje, mi parolis kun mia kunulo de lingva interŝanĝo el Francio. Mi bone komprenis kion li diris malgraŭ la fakto ke mi mem luktis paroli france.

En la dua semajno de oktobro, mi provis legi pli ofte. Mi legis iom el mia lernolibro de mallongaj rakontoj. Mi menciis tion en alia afiŝo.

Malkiel en septembro, mi malofte spektis aŭ aŭskultis aĵojn en la franca. Mi kredas ke super ĉio, tio malhelpis min. Tiuj aĵoj, kiel filmetoj en YouTube kaj televidaĵoj en Netflix, ege helpas min kutimiĝi al la franca. Ankaŭ tiu manko devos ŝanĝiĝi en novembro.

Ĉu mi progresis malgraŭ fari malpli? Ek al la memtaksilo!

Nuna franca nivelo laŭ la memtaksilo:

    Aŭda ricevado (Aŭskultado) – B1
    Vida ricevado (Legado) – B1-B2
    Parola interagado – A2-B1
    Parola produktado – A2-B1
    Skriba produktado – A2

Estis nenia ŝanĝo pri mia nivelo. Tio ne surprizas min. Ŝajnas, ke mi pliboniĝas po unu nivelo ĉiun duan monaton. Bedaŭrinde, tio ne estas sufiĉe bona por atingi nivelon de B2 en ĉiu kategorio antaŭ ol mi iros al la Universala Kongreso en Montrealo.

Sed mi kredas ke mi scias kion mi devos fari. Unue, se mi uzus Duolingo-n, mi devus uzi ĝin bone. Mi devus laŭte paroli la frazojn por kutimigi mian langon al la franca kaj mi devus interesiĝi pri la lingvolernado, ne pri mia rango. Due, mi devus spekti pli ofte filmetojn kaj televidaĵojn. Tiuj tre helpis min en septembro kaj mi devus ekzerci ankaŭ miajn orelojn pri la franca.

Lingvolernado ne estas tiom facila sed mi jam progresis multe ĉi-jare. Kaj mi povos pliboniĝi ankaŭ en novembro!

Dankon por legi!

Progresafiŝo pri mia septembra franca studado

Alia monato pasis kaj mi studas ankoraŭ la francan por prepari min por la Universala Kongreso en Montrealo. Ĉu mi studis vane?

Mi ne ŝanĝis mian ĉefan rimedon, Tiel restas Duolingo. La lecionoj fariĝis pli malfacilaj ĉi-monaton. Duolingo aldonis kelkajn novajn tipojn de ekzercoj kaj mi progresis iom tra la arbo, kio pligrandigas la malfacilecon de la lecionoj. Dankinde, mi apenaŭ uzis paŭzon de la sinsekvo kaj faris almenaŭ du lecionojn ĉiutage. Mi kredas ke la ĉiutaga ekzercado kutimigas mian cerbon al la franca. Ĝi ŝajnas malpli fremda laŭ mi post septembro.

Mi refaris kelkajn lecionojn en Pimsleur French sed mi ankoraŭ ne skribis recenzon de ĝi por la blogo. Tion mi devos ŝanĝi en oktobro.

Finfine, mi denove parolis kun mia amiko el Francio. Mi priskribis tiun tagon en lastatempa afiŝo.

La legado estis ne tiom ofta ĉi-monate. Mi legis rakonton en mia lernolibro kaj provis legi kelkajn artikolojn de Le Monde.

Tamen, mi spektis aĵojn en la franca pli ofte. Mi spektis kelkajn epizodojn de la franca serio Code Lyoko kaj kelkajn filmetojn. Mi ankaŭ aŭskultis pli ofte muzikon en la franca.

Do mi faris pli ol lastamonate. Ĉu mia progreso laŭ la memtaksilo montros plibonigon?

Nuna franca nivelo laŭ la memtaksilo:

    Aŭda ricevado (Aŭskultado) – B1
    Vida ricevado (Legado) – B1-B2
    Parola interagado – A2-B1
    Parola produktado – A2-B1
    Skriba produktado – A2

La aŭskultado pliboniĝis! Mi kredas ke mi povas nomi ĝian nivelon tute B1 ĉar mi povis kompreni la plejparton de la filmetoj kaj mi preskaŭ tute komprenis mian amikon kiam li parolis.

Mia ricevado estas la plej forta. En oktobro kaj la venontaj monatoj, mi devos trovi rimedojn por plibonigi ankaŭ mian produktadon de la franca. Eble mi devos skribi aŭ trovi grupon interretan por kunparoli. Aŭ eble mi simple pensos pli france. Ni vidos!

Dankon por legi!

Mia aŭgusta progreso pri lerni la francan

Tiu ĉi monato ne estis tiom bona por mia franca studado.

Mi uzas ankoraŭ Duolingo-n por studi la francan sed mi ne uzas ĝin sufiĉe ofte. Mi uzis plurajn paŭzojn de la sinsekvo. Mi ne plu faras la tempon ĉiutage.

Kvankam mi prunteprenis la finan parton de la kurso de Pimsleur, mi ne tiom uzis ĝin. Mi faris nur tri lecionojn.

Por legado, mi legis iom el la libro de mallongaj rakontoj sed mi ne plu legis la unuan libron de Harry Potter en la franca. Tamen, mi ŝanĝis la lingvon de mia poŝtelefono al la franca kaj mi ŝanĝis la duan lingvon de Facebook al la franca, do mi legas ĝin iomete pli ofte tiel.

Mi studis nek per mia gramatika libro nek per spektado de filmoj en la franca.

Bedaŭrinde, mia amiko de Francio ne povis paroli kun mi ĉi-monate kaj mia loka franca renkontiĝo ne plu renkontiĝas. Do, mi ne povis konversacii kun iu ajn en la franca.

Tiel estas mia progreso laŭ la memtaksilo:

Nuna franca nivelo laŭ la memtaksilo:

    Aŭda ricevado (Aŭskultado) – A2-B1
    Vida ricevado (Legado) – B1-B2
    Parola interagado – A2-B1
    Parola produktado – A2-B1
    Skriba produktado – A2

Nenio ŝanĝiĝis, kio estas ne malbona ĉar mi scivolis ĉu mi taksus min pli malbona ol lastamonate.

Mi kredas ke la problemo estas, ke mi ne plu renkontiĝas por paroli la francan. Sen tio, mi ne havas la motivon por agi. En la venonta monato, mi devos trovi internan motivon por studi. Verŝajne, mi devus fari ian ĉiutagan planon, kiel mi skribas ĉiutage ĉi tie. Ĉiutaga afero ŝajnas bona por motivi min.

Alie, mia franca ne pliboniĝos ke eble ĝi eĉ malpliboniĝos.

Resumo de mia franca studado por julio

Jen resumo de mia studado de la franca. Ĉu mi progresis?

Duolingo ankoraŭ estas rimedo por mi. La lecionoj fariĝas pli malfacilaj sed mi ne faras ilin tiom multe. Pro ĝisdatigo de la sistemo de sperto-poentoj, mi ofte povas fari nur du lecionojn ĉiutage por atingi 30 sperto-poentojn. Pro tio, mi faras malpli da lecionoj ol en antaŭaj monatoj. Eble mi devus altigi mian celon pri sperto-poentoj al 50 kaj tial mi farus minimume kvar lecionojn ĉiutage.

Mi finfine finis la bazan kurson de Pimsleur French sed tio ne signifas multe ĉar mi havis nur unu lecionon por fari. Mi pensas ke mi devus refari la lastajn dek lecionojn en la venonta monato kaj poste mi skribos recenzon de ĝi.

Mi parolis kun mia amiko el Francio nur unu fojon. La konversacio estis bonega ĉar li parolis kun mi tute en la franca la unuan horon. Bedaŭrinde, ni ne povis renkontiĝi pli ofte. Espereble ni renkontiĝos du aŭ tri fojojn en aŭgusto.

Kiel mi skribis antaŭe, mi ĉeestis la lokan francan grupon ĉi-monate. Tie, mi penis konversacii en la franca.

En alia afiŝo, mi menciis ke mi aĉetis la libron Harry Potter à l’école des sorciers. Mi legis ankaŭ la duan rakonton en mia lernolibro de rakontoj.

Kaj en ja alia afiŝo, mi skribis pri mia spektado de franca dokumenta serio. Mi spektis la du unuajn epizodojn kaj komprenis multe ĉar mi spektis kun ankaŭ subtekstoj.

Do mi legis multe pli ol kutime. Ĉu mia progreso laŭ la memtaksilo montros tion?

Nuna franca nivelo laŭ la memtaksilo:

    Aŭda ricevado (Aŭskultado) – A2-B1
    Vida ricevado (Legado) – B1-B2
    Parola interagado – A2-B1
    Parola produktado – A2-B1
    Skriba produktado – A2

Mi pliboniĝis! Kaj mi ja rimarkis tiun progreson en julio ĉar mi rimarkis ke legado fariĝis pli kaj pli facila. Eble mi atingis tiun nivelon, kion mi havis en Esperanto kiam mi finfine povis uzi la lingvon por legi pli-malpli senĝene.

Post morgaŭ, mi havos precize unu jaron, 366 tagojn, antaŭ la 2020 Universala Kongreso en Montrealo. Mia nuna progreso estas bona sed ĝi ne estos sufiĉa por atingi la nivelon de B2 por la kongreso. En la venontaj monatoj mi devos fari pli en la franca.

Miaj niveloj en parola interagado kaj produktado estos la plej gravaj sed se mi povas legi iom komforte en la franca, espereble mi faros pli iom nature.

Fari pli estis malfacile tiun monaton. Eble en aŭgusto mi pli ĝuos la lernadon. Dankon por legi!

Junia ĝisdatigo franca

Jen ĝisdatigo pri mia lernado de la franca. Ĉu mia progreso estis bona? Bedaŭrinde, mi pensas ke ne ĉar okazis problemoj. Ni vidu.

Ĉiutage mi studis per Duolingo. Tamen, malkiel lastamonate, la lecionoj ne estis tiom malfacilaj. Tio okazis ĉar mi estas evidente iom vanta. Kiam Duolingo ŝanĝis la klubojn en konkursojn, mi volis atingi la plej altan nivelon. Pro tio, mi faris pli da lecionoj sed por rapidigi kaj faciligi la gajnon de spertopoentoj, mi faris pli simplajn lecionojn. Mi ja atingis la rubenan nivelon sed je kia prezo?

Mi ne finis la kurson de Pimsleur French je la komenco de la monato kaj anstataŭigis tiun rimedon per alia.

La alia rimedo estis Drops. Mi volis reprovi ĝin ĉar mi legis kelkajn recenzojn pri ĝi en kiu homoj tre ŝatis ĝin. Kiel mi faris kun Esperanto, mi volis doni la apon duan ŝancon. Kaj mi ankoraŭ malŝatas ĝin. Mi sentas ke mi lernis preskaŭ nenion per ĝi eĉ kiam la vortoj estis novaj.

En la venonta monato, mi verŝajne skribos miajn proprajn recenzojn pri kaj Pimsleur kaj Drops.

Bedaŭrinde, mi ne povis paroli kun mia amiko el Francio pro kelkaj kialoj. Ni renkontiĝos denove en la venonta semajno. Tiu ĉi estis la plej grava problemo laŭ mi. Tiuj konversacioj havas multe da valoro kaj tio estis duoble malbona pro la sekva punkto.

La loka franca grupo ne renkontiĝis ĉi-monate! Ni renkontiĝos du semajnojn post nun sed en junio neniu renkontiĝo okazis.

Mi provis uzi Discord-on por kunparoli kun francaparolantoj sed tiu ne bone funkciis. La parolantoj kiuj mi trovis ofte uzis la anglan tro multe por ke mi eniru la mensostaton de la franca. Tamen, mi hazarde renkontis alian Esperantiston en franca kanalo tie, do la sperto ne estis tute malbona.

La lernolibrojn, kiujn mi recenzis ĉi tiun monaton, mi ne uzis multe. Post tiu recenzo, mi apenaŭ malfermis ilin. Kaj, por aldoni alian malbonaĵon al la monato, mi spektis kaj aŭskultis nenion ajn en la franca.

Mi nomas tiun ĉi monaton malsukceso, preskaŭ tuta malsukceso! Verŝajne la memtaksilo konsentos kun mi.

Nuna franca nivelo laŭ la memtaksilo:

    Aŭda ricevado (Aŭskultado) – A2-B1
    Vida ricevado (Legado) – B1
    Parola interagado – A2-B1
    Parola produktado – A2-B1
    Skriba produktado – A2

La niveloj ne pliboniĝis, kompreneble. Dankinde, ili ne malaltiĝis. La uzo de Duolingo eble gardis la nivelojn kontraŭ malpliboniĝo sed apenaŭ. Fakte, mi sentas min iomete malpli bona kompare de miaj kapabloj je la lasta ĝisdatigo.

Certe, mi ne sufiĉe uzis la rimedojn kiujn mi havis. Eĉ se mi ne povis konversacii kun mia amiko kaj la aliaj ĉe la loka renkontiĝo, tio ne devus forigi la uzon de la aliaj rimedoj. Eble, se tio okazas denove, mi devus uzi tiun tempon por spekti francan filmon aŭ legi ion.

Finfine, unu malbona monato ne forigas la eblon de sukceso. La celo estas fariĝi B2 nivela parolanto antaŭ ol mi iros al la 2020 Universala Kongreso en Montrealo. Mi havas ankoraŭ 13 monatojn por tion fari. Tio estas sufiĉe da tempo.

Espereble, mi lernos de tiu sperto kaj pliboniĝos en julio. Dankon por legi!

Mia maja franca progresafiŝo

Jen la maja ĝisdatigo pri mia franca, la ĉiumonata afiŝo temanta pri mia progreso lernante la francan. Tiun ĉi monaton mi iel faris pli ol kutime kaj iel faris malpli. La afiŝo estos longa.

Mi ankoraŭ studas ĉiutage per Duolingo. Kvankam mi menciis en blogafiŝo ke mi serĉas aliajn rimedojn, mi ne ĉesis uzi ĝin. Farinte ĉirkaŭ duono el la lecionoj, kiujn Duolingo markis kiel nefaritan post ĝisdatigo de la kurso, la ekzercoj fariĝas pli malfacila kaj mi pensas ke mi lernis pli bone per Duolingo tiun ĉi monaton ol la lastan.

Kvankam la taga kurso nur enhavas 30 lecionojn, mi ne jam finis la kurson de Pimsleur French, kiun mi prunteprenis per la cifereca biblioteko. Mi penas fari la tempon por fari la kurson ĉiutage, sed mi preskaŭ finis ĝin. Mi havas nur tri restantajn lecionojn. Kiel Duolingo, la nivelo de la lecionoj fariĝis pli malfacila. Mi eĉ lernis novan vorton: tout droit (rekte antaŭe). Mi konis ĉiujn el la aliaj vortoj de la kurso ĝis nun, sed la prononco de la denaskaj parolantoj estas tre bona kaj imitante ilin mi plibonigas mian prononcon.

Denove, mi parolis kun mia amiko el Francio. Mi menciis tion, konsilo lia al mi, kaj aliaj pensoj pri miaj spertoj farante lingvan interŝanĝon en alia blogafiŝo. Resume, li pensas ke mi devas legi pli kaj fari ion pli malfacilan por plibonigi mian francan.

La lokan francan grupon mi ĉeestis kaj lastfoje mi parolis pli ol en antaŭaj renkontiĝoj. Mi ja kontrolis mian vortaron kelkfoje, sed mi ne tiom penis trovi kutimajn vortojn.

Je la komenco de la monato mi uzis la novajn francajn lernolibrojn kiujn mi aĉetis lastan monaton, sed mi ne multe uzis ilin dum la lastaj du semajnoj. Mi intencas studi per ili hodiaŭ post kiam mi skribas tiun ĉi afiŝon.

Malgraŭ legante malpli, mi spektis kelkajn televidaĵojn en la franca per Netflix. Mi trovis retejon en la angla por malkovri aĵojn por spekti en Netflix kiuj estas en la cela lingvo kaj ankaŭ enhavas ĝustajn subtekstojn. Se vi lernas alian lingvon kaj havas Netflix-on, jen ligilo al ĝi. Elektu vian landon kaj la celan lingvon kaj ĝi montros ĉiun haveblan aĵon, ĉu filmon aŭ serion.

Finfine, mi faris la unuajn lecionojn de iKurso, kiu estas franca kurso por lerni Esperanton. Mi volas malligi la francan kaj la anglan en mia cerbo, ne plu tradukante ideojn de la angla. Mi pensas ke mi povus pli nature kompreni ideojn en la franca se mi uzus Esperanton por lerni ĝin. Kompreneble, mi preferus kurson por lerni la francan per Esperanto sed ne havante tion, iKurso estas sufiĉa.

Tio ĉi estas la plej longa progresafiŝo. Ĉu tio signifas ke mi pliboniĝis? Al la memtaksilo!

Nuna franca nivelo laŭ la memtaksilo:

    Aŭda ricevado (Aŭskultado) – A2-B1
    Vida ricevado (Legado) – B1
    Parola interagado – A2-B1
    Parola produktado – A2-B1
    Skriba produktado – A2

Mia parola produktado pliboniĝis!

Verŝajne la pli malfacilaj lecionoj en Duolingo kaj Pimsleur plej helpis al mi. Eble ankaŭ la aliaj rimedoj helpis. Mia skriba produktado nun estas sola kiel la plej malbona. Tio havas sencon, ĉar mi preskaŭ neniam skribas en la franca. Se mi uzus la gramatikan lernolibron, verŝajne ankaŭ tio pliboniĝus. La ekzercoj farus min skribi.

Paŝon post paŝo mi moviĝas antaŭen. La celo estas atingi nivelon de B2 por uzi la francan kiam mi ĉeestos la UK-on 2020 en Montrealo. Per tio, mi ŝajne povus ne uzi la anglan la tutan semajnon.

Ĉu mia franca pliboniĝos ankaŭ en junio? Ni vidos. Dankon por legi!

Mia franca, la aprila ĝisdatigo pri ĝi

Alia monato, alia ĝisdatigo de mia nivelo de la franca. Mi komencu.

Denove mi faris la tagajn Duolingo-ajn lecionojn. Duolingo refaris la francan kurson, do la plejparto de mia progreso estis perdita. Tamen, mi ne tro malfeliĉas pri tio. La punkto de la kurso estas ke mi lernu la francan. La nova kurso enhavas pli da vortoj kaj estas pli longa. Malgraŭ la iometa ĝeno, verŝajne ĉio estas entute pli bona.

Per la cifereca biblioteko, mi nun studas ankaŭ per Pimsleur French. La nivelo de la lecionoj ankoraŭ ne estas tiom altaj sed ili fariĝas pli kaj pli malsimplaj ĉiun tagon. Plejparte, ĝi helpas al mi plibonigi la prononcon de vortoj kaj frazoj. La lecionoj daŭras 30 minutojn kaj mi faris ilin tage la lastajn 14 tagojn.

Mi parolis kun mia amiko el Francio kaj li rekomendis al mi multajn francajn muzikistojn por aŭskulti. Pro tio, mi aŭskultas muzikon en la franca pli ofte. La rekomendaĵoj estas bonaj. El ili, mi plej ŝatas la muzikon de Noir Désir.

Ankaŭ ĉeestis mi la lokan francan grupon, tamen dum la lasta renkontiĝo mi plejparte ludis ŝakon kontraŭ islandano kaj ne parolis multe.

Finfine, antaŭ du tagoj mi ricevis du francajn lernolibrojn kiujn mi rete aĉetis. Unu estas libro de mallongaj rakontoj en la franca por ekzerci min al legado. La alia estas gramatika lernolibro por ekzerci min pri kiel formi frazojn. Ambaŭ estas por lernantoj je mia nivelo, inter CEFR A2 kaj B1. Tamen mi ankoraŭ ne uzis ilin.

Mi faras pli por lerni la francan. Ĉu la memtaksilo montros pliboniĝon?

Nuna franca nivelo laŭ la memtaksilo:

    Aŭda ricevado (Aŭskultado) – A2-B1
    Vida ricevado (Legado) – B1
    Parola interagado – A2-B1
    Parola produktado – A2
    Skriba produktado – A2

La niveloj estas la samaj.

Tamen tio ne ĝenas min. Lingvolernado estas malfacila kaj la memtaksilo enhavas malmultajn nivelojn. Estos monatoj kiam mi ne vidos pliboniĝon tiel.

Denove mia produktado restas la plej malbona. Espereble la gramatika lernolibro helpos al mi pri tio ĉar ĝi enhavas ekzercojn kiuj faros min skribi. La lernolibro de rakontoj verŝajne instruos min pri novaj vortoj. La novaj lecionoj en Duolingo kaj la pli postaj lecionoj de Pimsleur verŝajne ankaŭ helpos tiel.

Mi ankoraŭ antaŭvidas mian vojaĝadon al Montrealo por UK 2020. En majo mi esperas ke mi pliboniĝos laŭ la memtaksilo kiel en marto.

Marta ĝisdatigo pri mia franca nivelo

Mi faros la takson pri mia franca nivelo unu tagon pli frue ĉi-monate ĉar mi havas specialan afiŝon planatan por la 31a. Mi ankaŭ skribos la revuon de la monato morgaŭ pro tio.

En marto mi sukcese faris miajn Duolingo-ajn lecionojn ĉiutage. Mi ankaŭ aŭskultis kelkajn francajn filmetojn per Jutubo kaj, plej grave, mi ĉeestis ĉiun el la lokaj francaj renkontiĝoj kaj mi parolis kun du el miaj amikoj en la franca per la reto kelkajn fojojn. Tamen, mi ne legis multe kaj mi skribis preskaŭ nenion.

Mi zorgis ĉi-monate pri mia prononcado de la franca. Mi ne zorgis pri miaj legado kaj skribado dum la monato, sed kiel mi skribis hieraŭ, mi nun scivolas ĉu mi devus skribi en la franca pli ofte.

Ĉi-monate mi faris pli ol lastamonate. Do mi pensas ke la memtaksilo montros pliboniĝon.

Nuna franca nivelo laŭ la memtaksilo:

    Aŭda ricevado (Aŭskultado) – A2-B1
    Vida ricevado (Legado) – B1
    Parola interagado – A2-B1
    Parola produktado – A2
    Skriba produktado – A2

Estis pliboniĝo! Mia parola interagado pliboniĝis. Tio preskaŭ certe okazis ĉar mi parolis la francan multe en marto. Mi renkontis du homojn kelkfoje per la reto kaj ĉeestis ambaŭ francajn renkontiĝojn.

Kiel mi diris en la lasta afiŝo pri mia franca nivelo, la parola interagado estos la plej grava vojaĝonte al Montrealo. Mi tamen rimarkas ke mia produktado ne pliboniĝis. Mi esperis ke farinte pli parolajn interagadojn ankaŭ mia produktado pliboniĝus. Tio ne estis la okazo.

Eble en aprilo mi provos plibonigi la produktadon kaj skribado povus esti la rimedo por tio.